Пас аз қатъи воридоти дору аз Покистон, Афғонистон ҷамъоварӣ ва манъи фурӯшу истифодаи ин доруҳоро низ амалӣ мекунад. Ба нақл аз хабаргузории «Тасним», Раёсати тандурустии вилояти Нимрӯзи Афғонистон дар як эъломия хариду фурӯш, тақсимот ва истифодаи доруҳои покистониро дар ин вилоят манъ кард. Ин ниҳод аз масъулони дорухонаҳо, дармонгоҳҳо, бемористонҳо ва ширкатҳои яклухтфурӯши дору хост, …
Ба нақл аз хабаргузории «Тасним», Раёсати тандурустии вилояти Нимрӯзи Афғонистон дар як эъломия хариду фурӯш, тақсимот ва истифодаи доруҳои покистониро дар ин вилоят манъ кард. Ин ниҳод аз масъулони дорухонаҳо, дармонгоҳҳо, бемористонҳо ва ширкатҳои яклухтфурӯши дору хост, ки захираи ин навъи доруҳоро аз марказҳои фаъолияти худ ҷамъоварӣ кунанд.
Бар асоси ин эъломия, гурӯҳҳои назоратии Вазорати тандурустӣ дар сурати ошкор шудани доруҳои покистонӣ онҳоро ҷамъоварӣ карда, месӯзонанд. Ҳамчунин бо афроде, ки аз ин дастур сарпечӣ мекунанд, бар асоси қонун бархӯрд хоҳад шуд.
Ин иқдом дар идомаи сиёсати ҳукумати кунунии Афғонистон барои қатъи воридот ва аз бозори ин кишвар берун кардани доруҳои покистонӣ сурат мегирад.
Вазорати молияи ҳукумати кунунии Афғонистон қаблан эълон карда буд, ки аз моҳи баҳмани соли ۱۴۰۴ воридоти дору аз Покистон тавассути ҳамаи гумрукҳои Афғонистон манъ карда мешавад. Ин тасмим дар пайи дастури муовинати иқтисодии сарвазир гирифта шуда буд ва аз воридкунандагон хоста шуда буд, ки муомилот ва санадҳои тиҷоратии худро то муҳлати муайяншуда ба анҷом расонанд.
Ҳамчунин, Вазорати тандурустии ҳукумати Кобул рӯзи аввали баҳмани соли ۱۴۰۴ аз таъсиси кумитае барои иҷрои манъи доруҳои покистонӣ ва таҳияи нақшаи хориҷ кардани тадриҷии ин маҳсулот, гуногунсозии манбаъҳои таъмини дору ва пайдо кардани роҳҳои алтернативӣ хабар дода буд.
Ин вазоратхона эълон карда буд, ки иҷрои ин барнома бояд ба гунаای идора шавад, ки ниёзҳои бозори дору ва низоми тандурустии Афғонистон халалдор нагардад.
Қаблан низ расонаҳои маҳаллӣ дар Афғонистон аз идомаи ҷамъоварии доруҳои покистонӣ дар бархе вилоятҳои ин кишвар, аз ҷумла Ҳирот, Балх ва Кобул хабар дода буданд.
