Далели сафари Нетаняҳу ба Амороти Муттаҳида аз нигоҳи расонаҳои исроилӣ

Расонаҳои исроилӣ ҷузъиёти сафари Бенямин Нетаняҳу, нахуствазири Исроил, ба Амороти Муттаҳидаи Арабро фош карданд.

Ба нақл аз «Тасним», расонаи исроилии «The Times of Israel» ба нақл аз манобеи огоҳ гузориш дод, ки Бенямин Нетаняҳу, нахуствазири Исроил, дар сафари махфии худ ба Амороти Муттаҳида аз Муҳаммад бин Зоид, раҳбари ин кишвар, хостааст гузоришҳо дар бораи ҳушдори ӯ ба Нетаняҳу пеш аз ҳамлаи 7 октябри соли 2023-и Ҳамосро рад кунад.

Бар асоси ин гузориш, Нетаняҳу рӯзи якшанбе бо як ҳавопаймои хусусӣ ба Абузабӣ рафта ва тақрибан чаҳор соат дар Аморот мондааст. Ӯ дар ин сафар бо Муҳаммад бин Зоид мулоқот кардааст. Манобее, ки аз ин мулоқот огоҳ буданд, ба «Ассошиэйтед Пресс» гуфтаанд, ки меҳвари аслии гуфтугӯҳо гузоришҳо дар бораи ҳушдори эҳтимолии раҳбари Аморот дар бораи таҳдиди Ҳамос будааст. Дафтари Нетаняҳу ин гузоришро «хабари дурӯғ» хонда ва рад кардааст.

Ба навиштаи «The Times of Israel», шабакаи 12-и Исроил низ гузориш додааст, ки дафтари Нетаняҳу чандин бор хостори баргузории ин мулоқот шуда буд, то Муҳаммад бин Зоидро ба рад кардани гузориши мазкур мутмаин кунад. Бо ин ҳол, Аморот ин масъаларо як масъалаи дохилӣ дар сиёсати Исроил медонад ва бахусус бо наздик шудани интихобот, майле ба дахолат дар он надорад.

Дар ҳамин ҳол, шабакаи ҷамъиятии «Кан» гузориш дод, ки пас аз мулоқоти Нетаняҳу бо раҳбари Аморот, нишасти густурдае бо мақомоти баландпояи чанд кишвари Ховари Миёна баргузор шудааст; кишварҳое, ки бархе аз онҳо бо Исроил равобити расмӣ надоранд. Тибқи ин гузориш, ҳадафи нишаст баррасии ҳамкории минтақавӣ дар муқобила бо Эрон будааст.

Ин сафар дар шароите анҷом шуд, ки дар Исроил дар бораи гузоришҳо вобаста ба ҳушдорҳои пеш аз ҳамлаи 7 октябр, аз ҷумла ҳушдори эҳтимолии Муҳаммад бин Зоид ва инчунин ҳушдори мақомоти Миср, баҳсҳои густурда ба вуҷуд омадааст. Нетаняҳу қаблан гузоришҳо дар бораи гирифтани ҳушдор аз мақомоти хориҷиро рад карда ва масъулияти нокомиҳои амниятии пеш аз ҳамларо ба дӯши мақомоти баландпояи низомӣ ва амниятии Исроил гузошта буд.

Дафтари нахуствазири Исроил ҳамчунин эълон кард, ки Шин-Бет шабакаи 12-ро ба далели фош кардани сафари Нетаняҳу пеш аз бозгашти ӯ ба Исроил, ба сензураи низомии Исроил муаррифӣ кардааст. Дафтари Нетаняҳу иддао кардааст, ки фош шудани ин сафар метавонист амнияти нахуствазир ва ҳайати ҳамроҳи ӯро ба хатар андозад.

Дар ҳамин ҳол, Нетаняҳу рӯзи душанбе бори дигар гузоришҳо дар бораи ҳушдори Аббос Комил, раиси пешини дастгоҳи иттилоотии Миср, пеш аз ҳамлаи 7 октябрро рад кард. Ӯ дар шабакаи иҷтимоии «X» иддао кард, ки пеш аз ин ҳамла ҳеҷ мулоқот ё гуфтугӯе бо Комил надошта ва ҳеҷ мақоми иттилоотии Исроил низ ҳушдори Мисрро ба ӯ интиқол надодааст.

Нетаняҳу ҳамчунин расонаҳои мухолифи худро муттаҳам кардааст, ки бо матраҳ кардани ин гузоришҳо мехоҳанд масъулияти нокомиҳои амниятии пеш аз 7 октябрро ба дӯши ӯ гузоранд. Ӯ дар остонаи интихоботи 27 октябр ин масъаларо бахше аз рақобатҳои сиёсии дохилии Исроил дониста ва гуфтааст, ки мавзӯи аслии интихобот интихоби миёни ҷараёни рост ва ташкили давлати Фаластин аст.